藍天碧水，深潛拍攝海洋生物嘅一舉一動，肯定係我三十幾度高溫嘅最佳消暑娛樂！哪怕拎住部防水DC，甚至花近十萬元添置高階器材，又係咪可攝出令人滿意嘅作品？今日搵嚟有十多年水底攝影經驗嘅老行尊DiamondChan，佢簡單一句教路，以45°閃燈拍攝景物，即可攝出至清純、至靚嘅水底效果。
記者：陳國輝
攝影：潘志恆
模特兒：Irene@Zmodel
45°斜閃避水底雜質
Diamond於83年已舉行首個攝影展覽，而到01年，更加係PADI潛水及水底攝影導師，作品有水底人像、水底婚紗，當然唔少得仲有過百米深嘅水底壯麗景觀。「水越深，越見清澈，可惜本港玩潛水攝影嘅海底唔夠20米深，同馬來西亞達100至200米水深嘅環境，完全係兩回事！」
Diamond強調，水質好與壞，只間接影響拍攝質素，對於鍾情玩水底攝影嘅發燒友，技巧似乎更重要！佢話，水底拍攝可分為人像及生物兩種，前者最着重模特兒姿勢，並要適當為佢裝上鉛帶，避免出現上浮下沉嘅問題；而拍攝生物嗰陣，除留意周圍環境，唔好騷擾海洋生物嘅日常活動外，也要避過可能會傷害自己嘅有毒生物。但最重要一點，係由於海底充滿雜質，如果用閃燈直射落被攝對象，就會被呢啲雜質反射閃燈燈光，引致相片出現混濁不清嘅效果。最佳方法，佢建議將閃燈扭成45°，然後以斜閃方式拍攝，如果影大環境WideShot，可選用長臂加FisheyeDomePort240，閃燈Cover範圍便更廣；至於拍攝微距，則選用短臂加DXMacroPort50II，這樣出來嘅影像會最Pure，亦可避開水底雜質之反光問題。
Diamond作品
（器材：NikonD300相機、Aquatica潛水殼）
撐Nikon還原高兼夠利
趁炎炎夏日推出嘅潛水相機，多到十隻手指數唔晒，究竟邊款啱你？絕對因人而異。好似純粹玩浮潛，配備四防功能嘅OlympusTG-1，兩三千蚊已經夠玩！若打算深潛至10至40米，就需要另加一個保護性較強嘅防水相機殼；至於深潛至100米或以上嘅潛水發燒友，則必須選購專業級嘅高階防水設備。除咗Aquatica，例如日本品牌SEA&SEA，亦推出專為NikonD800以及Canon5DMarkIII呢兩部專業單反而設嘅鋁合金潛水殼，若加上一個鏡頭Port、兩支燈臂、雙閃燈以及BallClamp等，未計相機Body同配支靚鏡，淨係潛水器材都花近六萬蚊先玩得起！
至於身為水底攝影師嘅Diamond，對單反機有乜偏愛？「我就鍾意Nikon多啲，佢最吸引我係色彩還原度高、效果自然，而且邊位銳利，好適合水底拍攝；相反覺得Canon畫質無咁鋒利，而且色彩偏白，落到水底拍攝效果可能無咁靚。」
高中階落水利器
鋁合金魔蟹
專為Canon5DMarkIII設計嘅防水相機殼，可深潛至100米水底，由於淨機殼重量已達2.5kg，因此兩邊均配置鋁合金手柄，裝埋閃燈臂之後，十足魔蟹上身，超型！
頭盔咁大
專為NikonD800設計嘅潛水殼，同樣可深潛100米，由於全身為鋁合金，重量更達到2.8kg！裝上似頭盔嘅DomePort240後，造型相當特別。
細殼可深潛100米
玩深潛又想輕巧啲，可選擇為富士X10而設嘅Housing，淨機殼僅重1,100g，落到水更得番360g，並可承受100米水深壓力。
原廠出品勝在夠輕
由Olympus自家推出，專為E-PL3度身設計嘅防水殼，採用塑膠物料，好處係輕得嚟亦可深潛45米，有高階鋁合金機殼一半功力。
價平抵玩
專為四防相機OlympusTG-1設計，可增加TG-1潛水深至40米，然而最緊要係夠平，兼且額外支援閃燈，勁實用。
保養小Tips
清潔沙粒
防水殼會積聚頭髮、沙粒雜物，每次記得挑出來清潔一下。
查詢：
（a）SEA&SEA中港總代理（26860033）
（b）Olympus（23762150）