今屆倫奧嘅男子體操，真係好睇到爆，除咗有超級靚仔嘅德國選手阮馬素外，爆冷贏咗單槓金牌嘅荷蘭選手蘇達蘭一樣咁有睇頭。講靚仔，佢肯定及唔上阮馬素，但就勝在大膽，曾經影咗輯充滿藝術美感嘅全裸照，勁騷嗰八舊腹肌。
荷蘭金將男女通殺
喺前晚嘅單槓決賽，焦點肯定係中國選手鄒凱，可惜佢就衰咗，只係攞到面銅牌，衞冕失敗。贏咗金牌嘅荷蘭26歲選手蘇達蘭，事後即時俾人起底。查實佢喺09同埋2010年，都喺世錦賽攞到單槓銀牌，實力有番咁上下㗎；咁都未算，有人仲搵到佢喺4年前左右，影過一輯全裸照，但就唔係鹹濕嗰種，而係充滿藝術性嗰隻囉。
蘇達蘭喺呢輯相，展示咗男性嘅美感。佢擺出嘅姿勢，加上心口同小腹夾埋嗰十舊錯落有致嘅肌肉，配合成個冇任何多餘脂肪嘅身體，驟眼睇就好似文藝復興藝術大師米高安哲奴嘅雕塑咁；正到唔似一個人，直頭係一件藝術品至啱！唔怪得之除咗女人，唔少男人都鍾意佢，搞到佢成為同性戀網站嘅人氣倫奧選手！
蘇達蘭有如藝術品嘅身材，真係睇到人口水都流埋，但講到樣，24歲嘅阮馬素始終係「冧巴溫」。爸爸係越南人嘅阮馬素，喺前晚進行嘅雙槓決賽，繼個人全能決賽之後，又做二奶，輸咗俾中國嘅馮喆，只得銀牌。雖然佢喺倫奧贏唔到金牌，不過擸咗兩個銀牌，加上吸納一大批女粉絲，都可以話係收穫豐富啦。