近年升格為父母的男女藝人特別多，育兒趣事都不少。鄺文珣育有一對兩歲和四歲兒子，早前大仔在加拿大酒店被夾親手，鄺文珣嚇到多次見暈，比囝囝更驚青！張崇德就謂每天和仔女鬥智鬥力，練到EQ越來越高。
張崇德和太太劉美娟、鄺文珣昨日帶同子女到尖沙嘴出席慈善親子活動，一同製作紙船籌款。張崇德的五歲半大仔Hayden、四歲女Ching，在台下不停吹哨子搗蛋；鄺文珣的四歲大仔Cadence做訪問時，又在媽咪身邊跑來跑去，差點揭起她的裙，嚇得她心驚驚。
老公閂門夾親
鄺文珣囝囝早前整傷手，昨日仍要包住手指，但一樣活躍，她說：「佢下星期先四歲，之前去加拿大玩，中途喺酒店夾親手，冇咗成隻手指甲。」為何這麼大意？她說：「係佢爹哋帶佢去廁所時，閂門時唔小心夾親佢，佢都好內疚，我見到流晒血，即刻㩒住佢隻手指，但一㩒，我自己都驚到想暈，惟有一齊去急症室。」自爆是驚青媽咪的鄺文珣，又謂囝囝本來要縫針，但最終不用：「醫生同我講個仔嘅傷勢，要唔要縫針時，我都聽到見暈四、五次，唔係好受得住。」
劉美娟不縱容
同場的張崇德和劉美娟坦言不會縱容子女，每天都要和她們鬥智鬥力：「守時、有禮一定要做，呢個係底線，有時會鬧，但鬧嘅基礎係源於我哋錫佢。」劉美娟謂不想子女如同機械人般長大，不會定下太多規矩：「唔會畀框框框住佢哋，好似機械人咁，最想佢哋兩兄妹學識好好相處，學識親密。」她更表示只要誰爭玩具、霸玩具都會沒得玩。
採訪、攝影：盧妹