一小時的午膳，是解放亦是煎熬，炎夏要在商業區覓食，先經汗水洗禮，等位過後又要秒速KO，何苦？倒不如輕鬆嘆個精緻外賣，省錢省腳力，兼且中韓美食任你揀！
記者：潘紫芳
攝影：林栢鈞
模特兒：Wing@PureModels
雞油菜飯夠健康
每逢LunchHour，行過灣仔商業區，總會見到搵食人龍，當中你會找到一間開張不久的長龍外賣店──「嚐點」。此店專賣上海菜，午膳時間永遠排着長長人龍，一等可能要10-15分鐘，不過一班白領流着汗都要繼續等，因為老闆Jeff正睇準OL追求健康飲食的心態，特意將菜飯中的白米變紅米、豬油變雞油，健康口味背後所花時間更多，紅米煮前至少浸4-5小時，蒸熟後混和以雞油炒香的小唐菜，香味更濃，而且啖啖嫩葉，清爽得搣甩一般菜飯油膩口感，加上小店菜式齊全，連雲吞雞都有，與一般上海食店無異，的確吸引。至於王牌生煎包每日由店內師傅搓皮包餡，一籠一籠，售完再製，麪皮軟綿，肉汁爆滿。菜式內涵十足，賣相亦不失禮，特製深紅的外賣器皿，有別傳統發泡膠外賣的舊有觀念，「我們賣的不止是單純外賣食品，而是一份品味。」Jeff更提提各位OL，不妨預早打電話落Order，可省卻排隊等待時間。
嚐點（25274888）
地址：灣仔駱克道146-148號裕安大廈C1店
營業時間：周一至六7:30am-8:30pm
百年炸醬坐鎮
擁韓國血統的藝人宋芝齡（Angel），早月夥拍在韓國經營餐廳的媽媽，於銅鑼灣開設韓式外賣店。店舖近八成材料如辣椒、魚餅等均由韓國入口，加上由媽媽坐鎮主理，味道做法夠地道。店舖開業才兩個月，款式不多，但韓迷最愛的炒年糕、紫菜飯自然具備，並提供五款LunchSet。店內的百年炸醬麪是Angel外公傳下來的，以黑色豆豉醬和韓式辣醬炒香，再加入10種蔬菜中和油膩，保證令韓迷大快朵頤。
LingLingHouse（65986401）
地址：銅鑼灣渣甸街30B地舖
營業時間：周一至日12nn-11pm
註：暫未提供外送服務