銅鑼灣地舖租金之貴世界知名，近年除國際名牌以逾百萬元月租豪搶羅素街地舖之外，周邊利園山道及啟超道舖位，都出現大洗牌情況，高級鐘錶珠寶店以高一倍以上租金落戶，霸住啲舖起碼三年時間。
金行化妝店進駐對面街
啟超道對面便是希慎廣場，食正新商場效應，故不少零售商戶早着先鞭在過去一年內搶租。據本報統計，啟超道原有8個舖位中，有5個舖位轉換租客。
由本來的莎莎（178）、G2000，先後被周生生（116）、周大福（1929）及卓悅（653）以月租150萬至450萬元搶租，呎租300至1180元。
有不少業界人士早前認為，鐘錶珠寶由羅素街伸延至啟超道，是希慎廣場快開幕的緣故。但實際原因是商場對於近年肯畀貴租的高質租客──金行，竟被希慎「嫌棄」，商場內不見任何本地大型金行落戶，只有外國品牌鐘錶。故本地金行只好退而求其次，在商場對面開舖吸生意。
目前在希慎廣場旁、軒尼詩道488號地下開設分店的東方表行（398）董事兼公司秘書林慶麟表示，感覺到羅素街、啟超道及附近地帶，租金已經出現「頂頂地」的情況：「多咗業主想提早一年renew（續租）租約，亦多咗吉舖租唔出，始終零售市場已經回軟番，佢哋都聞到陣除，知道嚟緊市況可能麻麻哋，情願家就鎖死咗啲租約先。」
名牌爭進駐 大舖未飽和
不過林慶麟亦指出，長遠銅鑼灣舖租不會大跌，希慎廣場開幕亦有助帶旺該區：「仲有好多國際品牌未入嚟香港，佢哋一定會繼續高價同你搶舖，5、6千呎的大舖仍然會係供不應求，可能係細舖會難搞啲。」