下月31歲嘅鄭希怡（Yumiko）早前到泰國布吉為好友應采兒慶祝生日，點知樂極生悲發生意外搞到頸骨移位，不過今次意外卻令佢同化妝師男友Andy感情更進一步。Yumiko受傷期間獲男友悉心照顧，日前佢喺微博仲自爆接受男友求婚，唔知Yumiko係唔係開心得滯，噚日佢忽然喺微博上載一張好友戴上佢受傷紀念品—頸箍嘅照片，當中包括陳奕迅、徐濠縈、何超儀、陳子聰等，但佢post咗一陣就即刻刪除，唔知係咪怕俾人話攞傷殘人士嚟開玩笑呢？
明年在港擺酒
噚日Yumiko接受商台電話訪問，佢話婚禮暫定出年年尾或2014年年頭舉行，佢話：「原本打算去陽光海灘地方搞簡單婚禮，但因為我喺上海有太多親戚，所以最後決定喺香港擺酒。」Yumiko大爆男友當日喺成班朋友面前向佢下跪求婚，嗰一刻班朋友仲感動過佢㖭！Yumiko又大讚男友好細心，以前佢冇諗過結婚，但出事後就覺得要嫁，因為佢覺得男友喺佢有事發生時都一直喺佢身邊。