最近日本奶粉被指出現問題，郭晉安昨日接受商台電話訪問時，透露大仔令山以前因為腸胃敏感而食日本奶粉，幸不是食用疑有問題的兩隻牌子奶粉，他說：「嗰時大仔食奶粉只係輔助，因為媽媽主力都係餵人奶。」
飲澳洲奶
至於安仔二女現在已一歲，正吃澳洲奶粉，他說：「由於呢隻奶粉係原裝成罐由澳洲入口，我又睇過啲成份好好，食落去唔會好濃，所以我哋都好放心。」
另外，安仔太太歐倩怡和唐寧應邀擔任國際培幼會大使，早前遠赴陝西探訪該地的助養兒童，倩怡目睹小朋友悲慘生活環境後，禁不住哽咽說：「唔知點解，眼淚好似控制唔到不停流，我俾佢哋嘅堅毅志氣所打動。」而剛為人母的唐寧即場為小妹妹梳辮子和畫畫，盡顯母愛。
採訪﹕李珮洳