中國包攬倫奧乒乓球全部金牌，喺星期三上演嘅男團決賽，由教練劉國梁帶領嘅男子乒團以場數3:0橫掃南韓奪金。劉國梁賽後即刻同昔日亦敵亦友嘅老對手，今日已成為南韓教練嘅劉南奎相擁，惺惺相惜之餘，更嚟一個中韓大合照，緬懷過去。
「雙劉」鬥足十幾年
繼4年前京奧之後，中國再一次包辦奧運4面乒乓球金牌，馬龍同張繼科喺頭兩場單打同樣以局數3:1分別擊敗柳承敏同埋朱世赫；到雙打王皓夥拍張繼科，對住柳承敏同埋吳尚垠更加係一面倒贏3:0。
中國贏波之後，劉國梁恭喜完王皓同張繼科，跟住就走去南韓教練席同劉南奎擁抱。呢兩位昔日乒壇名將雖然唔算係同一代，各自都曾贏過奧運男單金牌，亦曾經喺90年代多次碰頭。擁抱完之後，劉國梁仲叫晒雙方球員一齊嚟個大合照；呢一刻邊個係冠軍真係唔重要，顯示友誼第一嘅奧林匹克精神。
劉國梁賽後話：「今次征戰奧運，感覺實在太攰。王皓用完美嘅表現為第3次參加奧運寫下完美句號，而倫奧對張繼科同馬龍嚟講只係起點，男乒大旗正式交喺佢哋手上。」
3次征奧都喺男單拎銀牌嘅王皓，雖然冇辦法圓大滿貫夢，但佢並冇遺憾：「我喺乒乓球之路一直都好順利，外人可能覺得3次拎銀牌係遺憾，但我覺得過程係完美嘅。我年紀已經唔細，今屆會係我最後一次參加奧運。」