呢個星期六一定係好日子，A＆F之外，台灣嘅誠品書店亦都係喺呢日正式開業，希慎（014）畀咗個優惠條款誠品，吸引誠品首次衝出台灣嚟香港開店，新店喺希慎個銅鑼灣新場希慎廣場。
明日開幕 引頸以待
希慎廣場呢個星期五開幕，屬於希慎近年一個重大嘅投資項目，投資額超過廿億，大股東利氏家族相當重視，你睇利家有幾多人出席個開幕禮就知。當日由希慎主席利蘊蓮主持大局，母親利孝和夫人、叔嬸利榮傑夫人同表哥利漢釗都會出現，幾咁大陣仗。
希慎廣場嘅商場部份已經租晒，焦點舖一定係誠品同傳聞中嘅蘋果店，誠品打算喺9月中前，每逢星期四至六試行二十四小時營業，將台式慢活藝文生活引入香港。銅鑼灣、中環越來越多新品牌進駐，潮人要keep住潮真係好唔得閒。