思捷（330）新行政總裁Jose的冲喜效果僅得一日，市場似乎好快就醒覺，單憑Jose嘅舊主Inditex（Zara母公司）名氣夠大，並唔代表佢一定可以為思捷帶來新希望。值得一提嘅係，今次思捷高薪挖角，仲罕有地提供一筆價值125萬歐元（近1200萬港元）的簽約獎金（Sign-onBonus）。顧名思義，就係你肯簽約已經有錢畀！
通常簽約獎金，係一啲出唔起太高薪的公司，又想吸引頂尖人才，先會提供呢個Offer，一次過畀筆大獎金過你，希望有人肯落叠。思捷今次底薪同保證花紅加埋都已經出到300萬歐元，加埋簽約獎金，第一年唔使做到咩成績，都淨袋425萬歐元！分分鐘思捷今年都賺唔到呢個數呀！海迪衰啲咁諗，呢啲工真係捱一年即走都抵啦！
Jose喺Inditex主要負責供應鏈部份，只管理幾千人，同思捷過萬人嘅規模明顯有距離，做CEO同搞供應鏈，點睇都喺兩個層次嘅事啦。雖然Zara供應鏈好強，貨品最快由生產同落舖15日搞掂，但Zara有自家工廠，又幾乎全部係做自營零售，先做到呢個效果。期望思捷可以變Zara？大家真係諗多咗。