李克勤最近似乎想洗甩中產味，繼之前首歌《活著為求甚麼》幫弱勢社群發聲後，近期整多首《姐姐》，以小朋友角度歌頌菲傭嘅辛勞。不過有博客鬧爆歌詞不知所謂，更指填詞嘅陳詠謙「帶領反智的年代，派膠的年代」。
歌曲先用小朋友眼光多謝「你照顧我爸爸媽媽」，但到副歌位無厘頭變成情歌：「原來沒有你但仍愛你才後悔當天不肯留住你朝馬尼拉的方向想起你你是愛的傳奇」，最後又離奇地唱「路過砵甸乍街竟找到你」，聽落唔知想點。
曾想怒炒菲傭
《姐姐》曲風已經80年代，官方MV同主題風馬牛不相及，講菲傭但又係TVB式一男一女行行企企，填詞嘅陳詠謙喺微博反擊該博客：「我實在可憐你的神經過敏，又同情你毫無幽默感。兩人行、天河、活著為求甚麼所談及的，你隻字不提，就這一首歌，你說我派膠？羞辱我還不夠，你還要羞辱這樂壇！」
其實克勤08年曾因菲傭唔小心跌咗乖仔Ryan落地而諗住怒炒菲傭，不過最後畀菲傭炒番轉頭辭職，唱呢首歌都唔多啱feel。
