啲人成日話足球員或籃球員啲生活好荒淫，查實游水嘅咪一樣又係。倫奧游水喺上個禮拜六煞科後，美國泳手洛捷迪同班隊友嗰晚就即刻去蒲，走嘅時候仲左擁右抱；平時佢練水超忙，連佢阿媽都話佢淨係夠時間玩一夜情，家陣仲唔玩餐飽！
的士醉攬兩艷女
倫奧游泳項目喺上個星期六正式落幕，洛捷迪雖然挑戰6金失敗（最終攞到2金2銀1銅），但一啲都冇影響心情；嗰晚即刻同隊友去倫敦著名夜店Chinawhite玩，當中包括比素、古倫鍾斯、卡亞利、基華斯同埋「港男」艾安恩等，其中基華斯仲帶埋未婚妻安妮一齊去㖭。間夜店亦好識做，開咗間VIP房畀佢哋玩，仲請金牌選手飲價值2,012鎊嘅雞尾酒。
去夜店玩其實冇乜大不了，只要唔搞出事都冇問題；但係洛捷迪唔知係飲得太多定係酒量淺，喺佢玩到第日凌晨3點半走人嘅時候，個樣貓晒；咁到未算，佢仲同古倫鍾斯帶咗兩個金髮低胸艷女上的士趕下場；而且，佢更喺的士入面同兩個囡囡扭作一團，睇嚟佢都幾猴擒。之前洛捷迪阿媽話過，囝囝平時忙於練水，淨係夠時間玩一夜情，睇嚟佢真係冇呃人。
費斯與女友密會
另外，決定喺倫奧後退休嘅費斯亦有去玩，仲喺凌晨4點偷偷哋同個金髮女子離開；消息話佢哋兩人去咗TheHouseofStBarnabas幽會，玩到清晨時份先走人。不過，有網友話，個女仔好有可能係喺Twitter度公開同費斯拍拖嘅25歲模特兒美瑾羅絲。
