上星期介紹過Ada喺《生化危機6》有幾神勇，吊咗咁耐癮嘅Fans又點會夠喉？今日繼續闖入CAPCOM大阪開發部，除原畫、道具曝光外，更有斷手周街擺，隨時刺激開發部創作靈感！仲有試玩埋全新AgentHunt模式，一嘗當「港式」喪屍，爆住中文向主角Jake大開殺戒！
記者、攝影：韓繼聰
鳴謝：CAPCOMAsia
珍貴原畫現身
今次大阪《生化6》之旅，試Game當然係重點，但另一個期望環節，係參觀首次對外曝光嘅《生化》開發小組工作室。工作室位於CAPCOM開發部六樓，記者們都屏息靜氣，似乎比試Game更興奮緊張。驟眼睇，工作室跟一般Office無乜分別，人人都專心工作，似乎為《生化6》推出作最後衝刺。難得入到開發部，梗要周圍八吓，邊行邊摸索，誰料突然喺地下踼到隻「斷手」，手上仲揸住STARS部隊支配槍㖭！我都知係假，不過失驚無神又真係俾佢嚇一嚇，可能開發小組同我一樣，度橋時鍾意揸住啲嘢Fing吓Fing嚟攞靈感啩。
行多兩步，發現《生化》經典道具古董打字機，遊戲內Save都係靠佢，Fans見到肯定百感交集。想睇新嘢？工作室牆上同櫃上，貼滿新作原畫，包括喪屍造型、場景同Storyboard等，Fans可以先睹為快。可惜嘅係，工作室首次對外開放，拍攝限制極多，想行多個Round都唔得，短短五分鐘已經要走人。
《生化危機》工作室
原畫曝光
地道喪屍識講：你死梗喇！
除咗上星期講嘅Adamode，今次試玩亦包括咗全新可以讓玩家擔演喪屍嘅「AgentHunt」模式。試玩嘅關卡咁啱就係以香港為背景，第一個驚喜就係扮演嘅喪屍狂爆廣東話「你死梗喇！」、「你走唔甩㗎！」，加上街景做得相當港化，更出現「昆人地產」、「維哥利亞酒店」等抵死招牌，感覺好地道。
玩法方面，當然就係以殺「人」為目標，起初玩家都係人，不過受一定程度傷害後，手部就會異變巨大化，調轉頭追殺人類，可惜好睇唔好用，速度大減命中率又低。到最後異變階段，就會完全變成怪物，今次勁得多，速度快、毒氣毒針攻擊力強勁，我都係靠佢打殘主角Jake！試玩的「AgentHunt」中，玩家的喪屍可無限復活，及選擇唔同位置重生，而據製作人講，正式版中每打爆故事模式一關，就可以解鎖該關嘅「AgentHunt」模式，打番「自己」，呢個模式大大增加咗《生化6》嘅玩樂性！
中式殭屍好恐怖
蘋：《蘋機會》
製：《生化6》製作組
蘋：點解今集情節會涉及香港街景？
製：香港有中國特色，又多橫街窄巷，陰森感覺跟遊戲好啱Feel。
蘋：香港街景做得好靚好真實，係咪親身來港取景攞靈感？
製：當然有嚟過香港。
蘋：今集有中國元素，有無考慮過加入中式殭屍？
製：我哋之前睇過港產片，見識過中式殭屍，覺得好恐怖！不過我哋啲喪屍係受病毒感染變成，唔同嘅。
