賓架P請退休賓架M吃午飯，叫埋左丁山去傾偈，又好啫，大家相識咁耐，談起那些年，那些事，豈不快哉。賓架P要去懷舊款嘅占美廚房，食其德國豬手，招牌菜也，左丁山食過一次，淨係睇隻豬手起碼有兩磅重，吃後飽到突晒兼有膽固醇心理威脅，以後不敢再吃，不過賓架P要減肥，近半年不吃碳水化合物（飯麪、麪包之類），只吃肉與蔬菜；不少專家又話碳水化合物含糖份甚高，吃得多會滋長糖尿病！一位美國醫生赴印度考察，途經香港，與左丁山碰頭，直情叫左丁山唔好食飯㖭。
賓架M與良人因為塞車，遲到十零分鐘，一坐低，只見賓架M精神煥發，容光四射，點似退休人士呀，唔繼續做事，真係浪費咗佢噃，於是對佢講：「梁特首組班好似有才難之虞，點解唔搵你！」賓架M笑到四萬咁口：「好彩冇人搵，一做高官就要上報紙頭版，到時唔通我賴老公，我不知情？」良人M亦大笑：「做官搵苦嚟辛咩，去馬場好過啦！」新高官出事，接二連三，嚇怕晒所有中環高管，問責制本來係以政治任命形式，在社會各方延攬人才入政府服務三、五、七年嘅，但香港人往往律己寬，律他者嚴苛，在商場打滾多年之成功人士，好難沒有一條半條辮子可以俾人捉住，一下子就將三十年艱苦奮鬥史抹個清光，換來冷嘲熱諷，何苦來由哉。
食到咁上下，收到賓架S短訊，原來佢摸上陸羽搵左丁山，一班飯腳俱在，獨欠一人，於是向賓架P、賓架M妻夫二人告別，走上陸羽吃甜品。兩點幾埋單，與賓架P一齊行落畢打街，點知就在畢打行門口俾人攔住，唔准通過，跟住湧咗幾十個上身赤裸之靚仔出嚟，一睇就知係模特兒身形，搞邊科呀？我地動彈不得，前面唔准行，後面人逼人，回頭一望，只見甘國亮與一位朋友企在畢打行門口樓梯，朋友與一位西裝友（似係管理人員）手指指，後來幾乎要埋身，甘國亮死攬住佢位朋友，拖開佢，都唔知發生乜事。我地隔籬有西婦二人，一位已經係十月懷胎，一位係老人家，狀甚辛苦，賓架S係美國人，對攔住我地嘅青年人講：「Letthemgo,pal.Theyfeeluneasy.」，唉吔，後面如果失控，人群湧過嚟，懷孕西婦唔知點算！後來知道呢間係A&F旗艦店，還未開業，是日出動大批男模特宣傳，搞到中環核心街道大亂。