除咗美國班泳手，英國部份選手都喺上個禮拜六落咗Chinawhite，但單車選手丹妮京治嘅男友認真唔生性，無端白事送個八月十五畀人睇，搞到個派對cheap晒。
英國班倫奧獎牌選手好似係賽艇嘅亨打、張伯斯及賀絲京，同埋幫國家贏咗單車女子團體追逐賽金牌嘅丹妮京治等齊齊去蒲，其中丹妮京治仲帶埋男朋友；唔知係丹妮京治嘅男友貪玩定飲大咗兩杯，失驚無神玩剝褲露個patpat出嚟。據消息人士話，丹妮京治嘅男友俾英國奧運隊列入黑名單，禁止再參加之後嘅相關活動或者派對，費事佢影衰啲奧運獎牌選手。
丹妮京治嘅男友咁失禮，好彩單車手韋堅斯同項全能好手恩妮絲為英國選手贏番啲印象分。喺禮拜日佢哋兩個仲執到鬼死咁型同扮到鬼死咁靚，出席贊助商三間牌嘅活動。