話說A&F旗艦店搵男子模特兒站在畢打行店外宣傳，令到八月三日下午兩點半嘅畢打行亂晒龍，人群走出馬路，阻塞交通，居然一個警察都見唔到，馬莎門口又聽到大聲公播出曾鈺成競選議員嘅錄音帶，加上中環路邊監測站嘅污染指數去到近二百，賓架S頂唔順啲尖叫聲、噪音、污濁空氣，拉住左丁山話一定要走，我倆惟有向後搵位，攝吓攝吓咁退入華人行，逃往戲院里。賓架S喘定之後，先至識得問：「搞邊科呀！」講解一番，此乃美國T恤零售直銷店Abercrombie&Fitch嘅香港旗艦店，好似係八月十一日開幕，嗰間舖以前係「上海灘」，但A&F出到月租七百五十萬元（據報紙報道），由地庫租到上一樓，於是上海灘及ChinaTeeClub要搬走，畢打行嘅業主係霍英東家族，認租唔認人，連霍家前度大新抱朱玲玲都冇面俾呀。八月三日又係霍家爭產官司和解之日！賓架S聽到頭昏腦脹，截斷左丁山之言：「月租七百五十萬港紙？It'scrazy.I'mgoingtoshortthestock！」
左丁山即刻叫佢咪住，睇定啲先。八月三日凌晨四時之A&F收市價係29.00美元，係2009年以來最低價，一日下跌咗15%，原因係公司預期下半年同店銷售額會比去年同期下跌，兼且上半年有1000間店嘅銷售低於預期，賓架S話：「咁講即係隻股走勢不佳，一有反彈就可以沽空！」沽空係高難度玩意，祝佢好運。
以數據而講，香港零售業似乎已過咗高增長期，六月份只係同比增長11%，珠寶鐘錶類增長最差，只有3.1%，顯示自由行豪客可能已經買夠貨，吸納慾減低。內地豪客買咁多高價名牌珠寶鐘錶，並非全為投資價值及滿足消費慾，其中有不少係送禮攞着數格，對中貿熟悉嘅人士皆知。至於A&F呢類賣T恤優閒服裝嘅店舖能夠點樣劏開內地客荷包，真係木宰羊。與賓架S在陸羽飲茶時，茶客C告知，一間藝術拍賣公司為免稅局追稅令自己惹上麻煩，將會結束北京業務，以後只在香港經營。內地有不少私人藝術藏品拎出嚟拍賣而來歷不明，稅局要追討過往之欠稅，令拍賣公司夾在中間，麻煩得要死，於是咪索性退出北京囉。