有乜依郁就搵老婆擋箭，似乎是政治人物的慣性動作。換了是體壇，絕少借另一半過橋，三長兩短，有教練出頭背鑊。再不對勁，推阿媽出來，阿媽牌比老婆牌打得響。
政治人物之所以未能搵阿媽打救，主要原因是大部份阿媽就算不是紮腳年代那把年紀，都不可能精伶，識得幫手拆政治菠蘿。更有不少政壇老媽，已經升天，天堂回望，只能唏噓阿仔講大話的能力，五十年如一日，比十歲時沒進步多少。
嗯，因母之名，本人一再深夜聲明，對所有交易，絕不知情。點解？因為阿媽生得我蠢，懵上心口是阿媽遺傳，冇解救。是以，無論是僭建花棚抑或地庫，將唐樓當海魚咁生劏，都與本人無關。罪在DNA，阿媽，唔好怪我，怪你生我好了。至於老婆，喔，我老婆不是大佬，但我老婆一樣有阿媽嘛。我有今日，多得阿媽，假如阿媽迫我凌晨四點起床練水，說不定，我已經是另一個孫揚而不是孫明揚。記者一定罵我，連阿媽都抽水。我諗，阿媽個神主牌不會懂得嬲。其實我都唔想抽水，淨想插水。咳咳……，首長局長與運動員，都是人，打波走線，好正常。請市民積點口德，別問候我阿媽和我外母。
逢星期一至六刊登