今年真係好多龍B出世，除咗娛樂圈，財經名嘴界亦有人有喜，金利豐研究部執行董事黃德几個細仔下星期一出世，一女一仔湊足一個好字，恭喜晒！
趕搵錢 一日假陪老婆
黃德几09年尾先結婚，未夠三年已經抱兩，認真快手，佢大女Aika家一歲九個月大，黃德几話自己屬龍，所以一早打算喺龍年生番個，暫時仲未幫阿囝改名，但英文名應該會係A字頭。
點解係A字頭？真係有得解㗎喎。事關黃德几英文名係Dickie，佢老婆叫Eva，黐埋變咗DickiEva，加埋大囡英文名係DickiEvAika，佢想玩接龍，咪要阿囝用個A字開頭嘅名囉!
可惜有薪侍產假仲未立法，黃德几又有幾個節目在身，所以下星期只係會請一兩日假陪老婆生仔，基本上都係要繼續開工，搵奶粉錢都好緊要㗎。