今年九月九日選立法會議員，直選部份空前激烈，譬如最多選民，最多議席嘅新界西、新界東，總共有35張名單，128人參選，議席只得18個，一定有110人係陪跑抬轎分子，得個玩字，明知自己冇希望而仍然願意將自己名字放落名單之末嘅，好有勇氣。
因限於選舉條例，電子媒介每講一張名單嘅候選人，就要表面公平讀晒其他候選人名字，好似新界東咁，一讀就要讀出73人名字，實在係強人所難，電台與電視邊會有咁多時間去宣讀吖，趕客咩，故此各位關心選舉人士，如想知道各區有邊啲人參選，請你地睇報紙好過嘞，電視電台唔會讀俾你聽嘅，好難想像電視電台如果辦選舉論壇，點樣先至會給予每一張名單同樣時間。大概新界東19張名單73人上場，全部介紹一次，跟住每張名單講三分鐘政綱，論壇節目已經夠鐘，呢啲節目，不睇不聽也罷。
按照比例代表制，以新界東為例，有選民874678人，假設投票率五成，會有四十四萬人投票選出九位議員，平均每張得到九分一選票（11.1%）就可以有一人當選，即係得四萬九千票左右就好掂，知名度及競選費不如人者，要集中在自己最熟悉嘅地區拉票，以免戰綫太長，無法兼顧。
選舉之前，要注意選民最關心甚麼議題。據中文大學鄭宏泰、張妙清與尹寶珊三人發表文章指根據民意調查，選民最關心嘅五大議題係（一）房屋29.6%，（二）民生25.4%，（三）保持經濟繁榮15.3%，（四）解決貧富懸殊10.7%，（五）爭取民主普選7.4%，上述五大議題，已佔去88.4%民意，想在直選取勝，呢五樣唔講唔得，講其他似屬嘥聲壞氣。不過呢五樣又係好難有短期解決辦法嘅噃，候選人只能開幾張支票，講住吓先。不過咁，講房屋一味要求政府加快興建公屋、居屋，萬試萬靈，特區政府要派糖呀，不如集中資源去興建公屋仲好，假如提議動用過千億元嚟回購港鐵、領匯，因住俾選民大罵唔嗅米氣，聰明候選人最好不要提。