啱啱嫁咗人嘅丘凱敏，噚日喺銅鑼灣搞咗個活動，除咗宣佈佢出新書之外，連佢喺now主持嘅節目《女皇駕到II》又播映，所以佢搵咗劉德華嚟撐場。話晒同丘凱敏識咗廿年，加上老友何麗全擔大旗，華仔亦畀足面到場支持，佢仲好識做咁同啲贊助商影晒相，呢個老友真係唔話得。
聽講丘凱敏結婚呢個消息，第一個通知嘅係華仔，華仔話：「我知道梗係開心，當係嫁女，我仲問佢想要啲乜嘢禮物，但係佢唔好意思講。」馮仁昭就話可能佢想要你就真，華仔即話：「亂噏啦，除咗我之外乜都得。」點知丘凱敏真係想要華仔做禮物，搞到華仔話：「我唔會鍾意啲結咗婚嘅女人。」
與可立同學敍舊
華仔仲話上個月同埋成班可立中學嘅同學，幫校長搞咗個退休晚會，個個同學都一家大細出席，大家咪問佢有冇帶囡囡出席，華仔就話：「我冇帶呀，我唔公開㗎。」提到開工後點調節湊女心情，華仔就話已經習慣咗，亦唔會改變。
華仔月中會拍杜琪峯嘅《盲探》，但盛傳同片嘅鄭秀文結婚，華仔就強調只係知要開工，可能拍咗佢啲戲份先，又話好少問人私人嘢，叫大家知道乜就通知佢。