可能係女性關係，所以最鍾意睇令人「典床典蓆」的比賽。兩個球手都歡喜，各有支持理由，邊個贏都歡喜，卻也邊個輸都惆悵，就像周旋於兩個愛人之間，不能二者兼得，點算好？無獨有偶，羽毛球男單和網球男單決賽，正好讓我陷入這種愛與痛的邊緣！
向來欣賞林丹，天生打法瀟灑過人，沒有人知道若果04雅典奧運他不是首圈出局，會否摘下當年那面金牌。同樣欣賞李宗偉，打法實而不華卻又充滿創作力，往往叫人睇到目瞪囗呆，可惜他的存在彷彿是為了襯托林丹的一枝獨秀，那才叫人難過。講真，那個黃昏我口中叫住林丹，心裏卻喊着宗偉，只因我認為宗偉值得拿一次奧運金牌！
睇住宗偉與奧運金牌失諸交臂後，隔不多久又要投入溫布頓翻版戲碼梅禮惡鬥費達拿，這次的痛苦在於費達拿萬獎俱獲，只欠奧運金牌。而梅禮背負比溫布頓更沉重的期望，原來英國人等了超過一個世紀，足足104年，你話梅禮點算？結果我替費達拿不值，如果佢一早知道同梅禮一人贏一個比賽，斷估佢情願贏少次溫布頓，話晒奧運4年至得一次，今次贏唔到，等下世喇！
文：盧覓雪
多棲藝能人