做咗廿年立法會議員嘅詹培忠突然退選，即刻引嚟梁營李君豪同唐營轉梁營嘅張華峰參戰，家立法會金融服務界有成5個人選，戰情都幾激烈。重點落喺李君豪同張華峰兩位證券行老闆身上，聽講，張華峰由交表嗰日開始，已經日日打電話同上證券行拉票，非常落力。
又電話 又拜訪行家
恒豐證券老闆張華峰曾經喺04年選過立法會金融服務界議席，雖然當年輸咗畀詹培忠，但選舉工程對佢嚟講，變得駕輕就熟。上星期一佢一話交表參選，已經即刻四出拉票。
據聞，張老闆家每日開市時就喺證券行打電話拉票，收市後就親身走去各間證券行搵老闆傾計，聽吓業界有乜訴求，講吓自己可以為業界做啲乜。好彩港股持續淡靜，好多老闆都無心機睇市，撥多啲時間同參選人傾計都無所謂!