李慧詩日前喺倫敦奧運為港勇奪單車凱林賽銅牌，25歲嘅佢成為香港第四位奧運獎牌運動員。李慧詩喺接受訪問時透露，比賽前係聽緊農夫首歌《456wing》，佢仲話覺得農夫兩個都喺舞台上實現到自己嘅夢想，佢都覺得自己一樣做得到。
之後農夫喺本報呢篇報道嘅網頁度留言話：「多謝農夫也能感動你，李慧詩加油。」雖然農夫原定今個月舉行嘅演唱會，因為俾唱片公司老闆指宣傳同賣飛不足而取消，相信佢哋嘅心情點都會受到影響，但李慧詩呢個訪問令農夫覺得好振奮，農夫成員陸永噚日接受電話訪問時話：「我開心到癲咗，好多人都send咗報道畀我睇，搞到我好似孕育咗個奧運金牌一樣。」
兜風怕暈
陸永覺得最開心係佢哋嘅作品就正如農夫播種一樣，家得到收成，佢話：「我哋做音樂最想就係啲歌影響到人，今次李慧詩呢句說話令我feel到更加冇行錯。」陸永話如果有機會同李慧詩見面，如果李慧詩唔介意，佢好想唱一次《456wing》畀佢聽，不過佢講笑話唔使李慧詩載佢兜風啦，因為佢怕暈。《456wing》呢首歌係陸永七、八年前嘅作品，歌詞除咗介紹自己，仲講出做音樂嘅辛酸同堅持。