利福（1212）老闆劉鑾鴻（細劉）捍衞唔到尖沙咀崇光間舖，俾業主提早收番，但就點都要捍衞自己啲員工，話佢哋無唔理顧客安全咁話。佢仲唔覺意透露咗自己時不時落銅鑼灣崇光超市買生果兼巡舖。
咁啱買生果兼巡舖
話說前晚崇光有條扶手電梯無啦啦冒白煙，細劉現場目擊整個過程，話未有白煙，警鐘已經響晒，保安即刻唔畀新客再入崇光，仲引導店內客人疏散。佢數白欖咁話，五分鐘警察就到、十分鐘消防嚟埋、半個鐘成件事解搞掂！
咁細劉點解會目擊整個過程呢?華華以前聽過細劉好鍾意幫襯崇光超市，尤其係100蚊個蘋果，200蚊個西瓜咁，原來呢個傳聞係真嘅。查實做得零售生意，梗係要時不時落舖睇吓，了解顧客需要同員工嘅服務態度，成日坐喺冷氣房做咩呢?