在此首先要恭賀李慧詩為香港奪得倫奧的第一面獎牌，並預祝她在往後的比賽再添殊榮。她的獲獎確實教很多人都興奮，起碼本地媒體不論立場都是一致讚好，仲有啲急不及待搬出甚麼發揚了「香港精神」。
如果說是為港爭光，這個還易理解，但「香港精神」嗎？真的需要一點聯想力，或者你會說「全力拼搏」不就是精神所在，那麼各國運動員，無論勝出與否，只要是傾力而戰（除咗「消極比賽」）嗰啲，咁係咪都係展現咗同一樣嘅「香港精神」？我絕非搞串個P，不過都冇理由學似啲官員咁，隨口就放大到乜「精神」、「核心價值」層面，查實都係「抽緊水」。不過諗深一層，李慧詩攞到銅牌之後，都唔需要喊着咁講：「未能爭取更大的榮耀，實在有負特區政府的栽培和國家的期望。」計落都仲有多少香港味道。
政府搞體育 形式化居多
需知政府從來就不重視運動發展，過往政策多着眼於硬件建設，以滿足社區規劃的基本需要，即係按人口配套康體設施，至於推動體育風氣和培育運動員的工作上，都唔知交過啲乜功課。喺香港要成為一個運動員，殊不容易，而要成為一個出色的運動員，更是難上加難，所以真係值得一再鼓掌。
上星期就恰巧有例子說明政府取態。香港田總提出將明年馬拉松賽事的最後一段路線稍作改動，跑手可以經過最繁盛的銅鑼灣地段，讓多啲市民為衝線嘅健兒打氣。這其實是所有舉辦馬拉松的國際城市，必然採用的路線設計，目的是讓活動不再只是一項賽事，而是全民投入的盛事。明年又會有七萬多人參加，如果能捲入以倍數計的民眾，已是很好的國民教育課。
不過，官員就好像嗰位堅決反對的灣仔區議員咁，因為要封路改道，會造成該區居民嘅不便，「後果更是不堪設想」喎。年中嗰度都唔知有幾多遊行示威發生，多半日用嚟「冲喜」，何樂不為？除咗「鼠目寸光」，都唔會有更貼切嘅形容詞。
噚日咁啱又係政府搞嘅全民運動日，搞到平時根本就唔做開運動嘅人，驚死蝕底先爭住去免費「卜場」，不過幾乎都係「NoShow」收場。所以呢次打鑼打鼓，到底又有幾實質咁推動咗市民嘅體育參與呢？與其耗資花工夫做埋啲形式化嘅事情，倒不如實實在在的搞好一個馬拉松，先有助建構一個現代城市應有嘅精神面貌。
盧先亞