荷蘭射手尹佩斯今夏高調要求離開阿仙奴，心諗以上季英超神射手嘅威名，要加盟有盃捧嘅球隊應該唔難，之前傳過曼城、曼聯同意甲嘅祖雲達斯都想簽佢；點知歐國盃完咗個零月，尹佩斯轉會仲未有聲氣，英國傳媒報道，佢已經死死地氣歸隊，周一隨隊到德國集訓，要喺異鄉過29歲生日。
尹佩斯成個7月嘅新聞，大部份都同轉會有關，阿仙奴甚至連亞洲之旅都冇預佢，搞到部份香港球迷好不滿；甚至吹到意甲冠軍祖雲達斯，已經準備1,000萬鎊（約1.2億港元）年薪利誘佢過檔。點知等吓等吓，尹佩斯仲未有落實離隊消息。
周一就喺尹佩斯嘅29歲生日，而球隊亦都會出發到德國集訓，同友賽科隆㖭。始終尹佩斯喺球隊聲望都好高，一眾隊友到時都會同佢搞生日會。阿仙奴領隊雲格，一向嚴守「3字頭」死線，球員就到30歲就好少有長約，甚至好似亨利咁賣走，就快29歲嘅尹佩斯又點呢？雲格就口口聲聲想佢留隊，而且未來一季仲會全力邀請佢續長約，但尹佩斯肯唔肯動筆，都要睇吓嚟緊一季成績同球會野心。
講開野心，雲格今季都算大事擴軍，希望留住尹佩斯，普多斯基、基奧特已經加盟，西班牙翼鋒辛迪卡索拉都好快成事，3位都係國腳級，而且有傳阿仙奴想簽埋阿積士右後衞雲達韋爾，轉會費都達700萬鎊（約8,400萬港元），尹佩斯多個同鄉，或者會增加留隊嘅意思啩。