體育用品股噚日醒晒，第一隻派成績表嘅安踏（2020）中期純利跌17%，股價反而升17%，「體操王子」隻李寧（2331）亦升12%，不枉佢哋出力贊助倫敦奧運，股價終於有啲反應，但耐力有幾強就唔知嘞。
唔返港主持業績會
安踏今次贊助成支中國代表隊，運動員上台攞獎、做訪問都一定要着番件安踏風褸，大賣廣告，咁緊要嘅事，主席丁世忠一早飛咗去倫敦坐鎮，佢仲唔捨得中途返港，噚日公布業績都唔嚟香港主持大局，指派無去倫敦嘅首席運營官賴世賢同首席財務官凌昇搞掂。
兩位高層好識賣廣告，唔着西裝，改着佢哋贊助嘅「龍服」講業績，成套「龍服」喺街度賣708蚊人仔，香港無得賣，深圳就賣斷市。即係賣咗幾多套呢?公司守口如瓶，照計好事傳千里，唔使咁秘密嘅!