「既生瑜、何生亮。」千奇唔好誤會呀，唔係講緊晚晚套電視劇，而係注定要做悲情主角嘅馬來西亞羽毛球手李宗偉。佢嘅天敵唔係林峯，而係林丹！
隨住喺倫奧嘅男單決賽又一次輸畀「超級丹」，29歲嘅李宗偉經已喺連續兩屆奧運、2010年亞運、同埋舊年嘅世錦賽決賽，通通死喺林丹拍下。睇嚟會係最後一屆打奧運嘅李宗偉，輸波之後呆坐喺場中間，最終都忍唔住留下男兒淚：「我已經搏晒命去打，之前受傷搞到得番兩星期備戰奧運。5場比賽，場場都要食止痛藥嚟打。喺關鍵嘅時候一路領先，最後都要輸確實有啲難過，但命運係咁，我只有接受！」真係聽到都心酸！
李宗偉亦特別向所有馬來西亞fans致歉：「好對唔住，贏唔到金牌，我嘅發揮比起京奧同世錦賽嗰時更加好，但似乎我整定係企喺林丹旁邊。」
自傳叫《敗者為王》好邪
其實佢同林丹鬥足咁多年，是敵是友有時都真係分唔清，網上都有見過佢地惺惺相惜嘅合照。林丹贏完金牌之後，亦提到嚟緊想畀老婆謝杏芳一個「非常婚禮」，或者可以考慮請李宗偉做伴郎喎。
雖然比賽成日都輸畀林丹，但講到出自傳，李宗偉就快一步，今年初經已推出咗，仲親自題名㖭。不過個名就真係唔多老利，叫《敗者為王》。佢就話想與眾不同啲，兼且表達出佢永不放棄嘅奮鬥精神，但係有時真係唔到你唔信㗎……