內地體育用品股除咗贊助中國隊，亦落實中國企業「走出去」政策，贊助好多外國隊。贊助最多外國隊嘅應該係匹克（1968）。
匹克今屆奧運贊助咗新西蘭、斯洛文尼亞、塞浦路斯、阿爾及利亞、約旦、黎巴嫩同伊拉克共七隊國家隊，反而一支中國比賽隊伍都無，相當國際化。
李寧（2331）揀晒中國金牌隊之外，亦有贊助瑞典國家隊、西班牙籃球隊、阿根廷籃球隊同厄立特里亞田徑隊（厄立特里亞係非洲東北部國家，93年脫離埃塞俄比亞，宣佈獨立）。
至於扑中咗中國飛魚孫楊嘅361度（1361），確實唔弱，仲贊助埋北韓國家隊，華華真係好想知道公司係點傾呢個贊助返嚟㗎呢?