奧運村玩到癲

各國運動員參加奧運，一上到場就為獎牌而戰，激烈程度同斷六親冇乜分別；但係其實返到選手村，大家都會將勝負暫時拋諸腦後，仲玩到好鬼死friend㖭！英國傳媒仲收到風，話已經有運動員忍唔到要曳曳啦！
唔好以為各國好手喺呢十幾日入面，真係唔飲酒、唔洩慾；原來選手村入面有間酒吧，仲有人話哈薩克選手舉重代表，贏親金牌都會落去慶祝，happy到爆，有班巴勒斯坦運動員走埋去一齊玩，結果兩班人玩咗成晚都不知幾開心！奧運一到，國與國之間邊會有隔膜？

戴利cosplay變消防員

意大利女泳將比姬蓮妮，之前話同男友泳手馬蘭尼禁慾，專心比賽；不過前者喺上周六竟然話：「禁慾？你唔係黐線呀嘛？」仲有運動員話張床長短唔係問題，但係就怕唔夠闊。唔怪得杜蕾斯今屆派出嗰15萬個安全套，話咁快就派晒。至於有成5,000個座位嘅飯堂，已經變成識人嘅最好場地，因為運動員之間唔會面阻阻，只係得伊朗、以色列兩國死都唔肯坐埋一齊，而敘利亞班選手就玩自閉，完全唔同人打開自己心扉。
英國跳水王子戴利仲型，搵埋兩個隊友去咗村內嘅消防局，3條友着晒消防員制服影相！奧運精采之處，就係場外仲多嘢睇過場內。