呢日碰到一位股壇名嘴，同佢講股票之餘，講吓政治八卦，名嘴話：「無官一身輕，競選議員反惹麻煩，好彩我冇票在手啫，否則會俾人扯開幾邊，嗱，詹培忠如果出選，以佢過往之紀錄，勝望壓一，點知佢老人家突然退出，於是金融服務界別有張華峰、李君豪、甄文星、鄧予立及林德明五個候選人，都唔知選邊個，我唔識甄文星及林德明，但李君豪、張華峰、鄧予立三位老闆同我地班財經演員、名嘴、分析師都平時有往來嘅啫，三位都與中方、中資親近，你話怎麼辦？」又係幾難搞嘅，李張鄧三人各有中方線路，各有證券經紀界人脈，明顯係建制派內戰，呢場仗會打得幾好睇。
名嘴又慨嘆發生麥齊光事件後，太太涉及其中，跟住又有陳茂波太太劏房事件，搞到啲阿太好驚，以佢所知，一位有資格人士本已得到某位局長力邀做副局長，佢亦有意「為公眾服務」，但返到屋企同老婆一講，老婆反應冷淡到似南極：「我唔想阻你做副局長，不如同我離婚先啦！」原因大家實估得中，太太唔想受拖累日日見報呀，早前有麥太與曾太，依家有陳太，令啲阿太好唔安樂，老婆咁講法，身為丈夫會怎麼辦？答案容易到極，立即向局長講句：「多謝錯愛，我唔敢行入熱廚房！」
「熱廚房」最近成為英文。據老友記褚簡寧在佢嘅英文專欄講，梁特首與林鄭司長最近講英文，都有用hotkitchen一辭，褚簡寧話兩位大人物都錯用英語，英文諺語並無「熱廚房」hotkitchen，只係會有ifyoucan'tstandtheheat,getoutofthekitchen（直譯係如果你不能忍受熱量，離開廚房！）中文傳媒寫寫吓就創下香港獨有名詞「熱廚房」，估唔到又有人將之繙譯為英文hotkitchen，而梁特首及林鄭司長竟然引用之，故此褚簡寧嘆息香港人英語水平！褚簡寧所講之英文諺語，我地在中學時代已經學過，本來不值一談，但而今中國人站起來了，「功夫」都成為英文咯，講唔埋hotkitchen一詞，遲啲會見諸於牛津大字典㖭，此乃香港對現代英語文化之貢獻！褚簡寧不妨睇開啲！