都係倫奧惹的禍，今屆無端端有大班型男索女上戰場廝殺，搞到班港女聲又沙晒、班宅男眼又矇晒，晚晚準時坐喺電視機前。其實，我哋娛樂圈都有大把人同佢哋似樣啫，好似中國男泳史上第一金孫楊，根本就係少爺占化身；中國體操選手鄒凱同郭偉陽，同李逸朗、黃貫中又係一模一樣；至於香港嘅天使黃曉盈，其實同Lavina都幾似㗎！ 撰文：蘇芬妮
孫楊（中國游泳選手）vs少爺占
田徑有劉翔，游泳有孫楊。作為中國男泳史上第一金得主，少爺孫雖貌似弱不禁風嘅少爺占，但一剝衫即見真章，尤其佢喺400米自由式鍊贏泡菜宿敵朴泰桓、震臂怒吼個樣，幾有霸氣。
杜格拉絲（美國體操選手）vs舒淇
倫敦奧林匹克體育館因為有女子全能體操冠軍杜格拉絲而變得耀眼。除咗因為佢係少數嘅黑人體操選手，仲因為佢同舒淇好似，尤其係豐滿嘅雙唇，同堅毅嘅眼神，根本如出一轍。
郭偉陽（中國體操選手）vs黃貫中
郭偉陽臨危受命頂替受傷嘅滕海濱出戰，佢喺資格賽連番犯錯，差啲俾內地同胞嫌棄。團體賽不容再失，郭偉陽心裏嗌住呢一句：「贏輸贏贏輸」，結果幫中國拎番面金牌。
露露（瓦努阿圖乒乓球選手）vs鄧穎芝
露露雖然喺外圍賽俾巴西代表秒殺，但志在參與嘅佢輸波照樣做出得成女傭嘅勝利手勢，就好似樂壇不死鳥鄧穎芝一樣，都係靜候一個閃亮嘅機會。
約舒阿星（瓦努阿圖乒乓球選手）vs周潤發
瓦努阿圖，未必係你想住嘅地方，但連揸鑊鏟嘅伙頭阿星，都可以拎住塊紅雙喜波板去參賽，係咪心郁先？英雄莫問出處，生於南丫島嘅發哥一樣可以喺荷李活留名。
黃曉盈（香港體操選手）vsLavina
Angel自創「天使上馬」震撼倫奧，而佢嘅嬌艷外表同謙恭態度就更多人討論。模Lavina都有自創嘅「港女十式」，如果出埋「天使下馬」寫真仲正！
加利亞素（意大利射箭選手）vs陳子聰
今年倫奧射箭團體賽由意大利爆冷勝出，意大利箭手加利亞素當然功不可沒啦，就連同佢失散咗多年嘅兄弟陳子聰都戥佢開心。
沙伯托（法國體操選手）vs馬國明
沙伯托平日四四正正，但肉緊起嚟個樣超chok，比起馬國明喺電視劇《回到三國》入面嘅浮誇表情，有過之而無不及。
新竹優子（日本體操選手）vs陳芷菁
陳芷菁代表無綫遠赴倫敦直擊，係咪無聊得滯走埋上平衡木玩番兩手？睇真啲原來係新竹優子，兩人面形一模一樣，連兔仔牙都一樣！
葉詩文（中國游泳選手）vs鄭佩佩
葉詩文喺混合四式破晒紀錄，但慘被質疑服禁藥。雖然承受千噸壓力，16歲妹妹輕輕一笑帶過，直頭有俠女鄭佩佩嘅風範。
泰肺（工作人員）vs秦沛
早排喺電視日見夜見秦沛，家就連奧運場館都有佢蹤影。呢位着老西、配戴住工作證嘅仁兄，確實係黑版秦沛，叫佢泰肺都幾啱！
鄒凱（中國體操選手）vs李逸朗
中國男子體操團體賽嘅金牌功臣，非鄒凱莫屬，佢喺單槓同自由體操都係全場最高分，但最令人驚訝嘅係佢同過氣歌手李逸朗成個餅印咁。
祖爾菲亞（哈薩克舉重選手）vs小儀
祖爾菲亞俾中國隊放逐，又冇美麗外表，箇中滋味只有小儀明白。不過佢同小儀一樣憑鬥志默默耕耘，終於幫哈薩克奪金。
葉姵延（香港羽毛球選手）vs徐濠縈
一頭清爽短髮嘅黑妹葉姵延，其實同Eason嫂徐濠縈甚為相似，話唔定兩人來個運動時裝crossover，可以賺番一筆。
加藤凌平（日本體操選手）vs梁靖琪
日本體操選手加藤凌平比賽時會化淡妝同修眉，成個花樣美男咁，遠睇十足十女生宿舍年代嘅Toby，不過係靚版囉！
