教協話要在九月開學後，推動罷課，若果真係實行得到，會係一項歷史紀錄，左丁山自識字以來，都未見過有香港學校學生全體罷課呢回事，唔通呢次為咗抗議國民教育科，就會搞得成全港罷課？苟如是，孫公退休養病之時，可能撚鬚微笑，佢埋下呢個地雷，果然令到缺乏政治管理經驗嘅梁特首爆到頭破血流。假如係唐英年當選嘅話，有冇高人留下錦囊教佢拆彈掃雷呢？
肥仔K在英國讀書一年，見過罷課兩次，一次係職員抗議薪水低，全部罷工，令到學校罷課，冇堂上；另一次係教員教授抗議薪水低，不上課，於是學生返到學校冇堂上，等於罷課，大概此等事情在英國司空見慣，罷課就罷課啦，學生與教授一齊落pub飲啤酒可也。
香港就唔同，中小學罷課？老師（教協）發動？以香港之婆婆媽媽性格（譬如按章工作前先向市民道歉之類），教師若無學校同意，家長贊成，幾難搞得成，而且到時一定有學校（左派、直資、國際學校、東華三院、保良局部份教會學校、官立學校）繼續上課，教協要承受家長責罵（我個仔返唔到學，邊個理呀！），幾惡頂。
左丁山讀大學時，參加過一次罷課，且係搞手之一，抗議政府削減大學經費。同學當係放假一天，走鬼晒，一齊靜坐抗議之時，只有十幾二十人，毫無氣氛，左丁山另一位同學走上課室，逐一拍門叫教授停課，差不多個個合作，人人樂得一日閒啫。點知後來見到牟宗三先生繼續上堂，唔睬我地，同學又唔敢出聲，邊個夠膽叫講到口沫橫飛嘅牟宗三停課噃，我地唯有詐作睇唔見。今時今日人人講教育持分者，持分者意見多多，惡過牟宗三多多，點罷課呀！
梁振英見記者第一次開腔講國民教育，顯然有意「分而治之」，國民教育繼續推行，教材任揀，唔鍾意嘅學校可以唔教住，開辦課程嘅學校，一定有津貼（五十三萬元），資深記者A對住左丁山大嗌：「我點呀，個女得七歲啫噃。」，左丁山話：「上堂唔駛死嘅，返屋企你同個女消毒啦，例如同佢一齊睇法語片『非常愛樂團』，或者講英女皇與占士邦跳降落傘呢類英國式國民教育，唔駛驚咁多嘅！」