費達拿又創紀錄喇！不過今次唔係乜嘢第幾個大滿貫，又或者幾多個星期排名第一，而係講緊佢喺奧運男單網球4強，用咗足足4個鐘頭26分鐘先至淘汰阿根廷嘅迪樸度，創下公開賽年代以嚟，打得最耐嘅3盤制比賽；比起09年拿度同迪祖高域喺馬德里嗰場馬拉松大戰，仲要長23分鐘。
費天王喺呢場4強先失一盤3:6，之後幾經辛苦贏返7:6，去到打長盤制嘅第3盤仲甘，同「巨人」迪樸度激戰36局後，先至贏埋19:17晉級決賽。身為17項大滿貫得主嘅費達拿賽後都鬆一口氣：「簡直係精神折磨，不過能夠置身其中又幾正喎！我都戥迪樸度唔抵，但好開心幫瑞士帶嚟一面獎牌。」
溫網翻版與梅禮爭金
費達拿今晚決賽嘅對手，正正就係佢一個月前喺溫布頓決賽嘅手下敗將梅禮。呢位英國奪標希望，喺4強以直落兩盤7:5，將2號種籽迪祖高域淘汰。賽後梅禮好激動咁話：「呢場波可以話係我打波咁耐以嚟，情緒最激動嘅一場，係一個完全唔同嘅經驗，打奧運嘅感覺寧舍唔同。」
梅禮喺今年嘅溫布頓，成為74年嚟第一位打入決賽嘅英國球手，可惜功虧一簣輸咗畀費達拿，嚟緊金牌戰又對返「1哥」，佢唔希望令英國球迷失望多一次：「識我嘅人都知我幾咁恨攞面金牌，我喺溫布頓打得好好，所以唔會改變打法，不過今次我更加有決心贏費達拿，搶面金牌返嚟！」