夢幻隊唔留手，非洲兵出晒醜！美國男籃喺星期四上演嘅奧運男籃A組分組賽，憑安東尼狂轟37分，以156:73大炒尼日利亞，錄得3連勝，更打破5項紀錄！
美國隊繼上場大炒突尼西亞，搞到後者教練忍唔住怒摑球員後，星期四繼續強攻另一支非洲軍團尼日利亞。一開波夢幻隊就打出一段13:0嘅攻勢，為呢場歷史勝仗揭開序幕。雖然尼軍及後奮戰下，一度追至10:20，但今場嘅主角安東尼（Melo）出場後，惡夢先正式開始；Melo落場唔夠4分鐘，3分波4射4中，半場領軍以78:45遙遙領先。
縱使勝負已分，美國隊都冇放軟手腳。唔知真係唔記得着波衫，定係俾人收埋咗，總之下半場先有得落場嘅「一眉狀元」安東尼戴維斯，接應Melo妙傳「拆你屋」，好似表演賽一樣。而「着火」嘅Melo更加係勢不可擋，3分波全場12射10中，共轟入37分，刷新奧運個人最高得分紀錄；仲帶領美國大炒156:73，打破巴西喺88年漢城奧運，造出嘅最高得分138分。同時，夢幻隊亦改寫其他紀錄，包括半場最高的78分、單節最高得分49分，以及攻入29球3分波，一共5項奧運紀錄！
一場入29球3分
今仗僅上陣14分鐘29秒就威到盡嘅安東尼，賽後都話難以置信︰「我哋射波射到今場咁好，準繩度又高成咁……簡直難以置信。」教練科錫維斯基都有同感：「我從來未帶過隊波，射波水平好到今晚咁樣，當你可以一場射入29球3分波嘅時候，真係想輸都難，佢哋今晚嘅表現實在係難以置信！」