玩具大王蔡志明細女、30歲蔡加怡（Crystal）昨日結婚，嫁給設計師男友陳漢聰（Jeremy）。百億身家的蔡志明送了億元獨立屋給細女做嫁妝，開幼兒園的蔡太就表示留定學位，鼓勵女兒「盡量生」！
玩具大王蔡志明一家篤信基督教，細女蔡加怡昨日早上在九肚山大宅出發，到中大崇基學院的禮拜堂，以基督教儀式行禮。未夠10時，新娘蔡加怡和新郎陳漢聰一身傳統中式裙褂到場，蔡加怡胸口掛上巨型金豬牌，滿手金器，十分誇張，她一落車就笑：「唔傾住，要入去換婚紗。」
母幼兒園留定位
蔡志明和老婆蔡李惠莉大讚新女婿陳漢聰，蔡太狂話不捨得細女出閣，她說：「我有啲唔捨得，唔慣佢嫁人，不過呢個男仔好乖仔，好錫加怡，希望佢哋婚後可以多啲返屋企，同我哋見多啲。」有否催生仔女？她說：「講咗喇，叫佢盡量生，我開幼兒園，留晒學位畀啲孫㗎喇，越多越好。」
大女蔡加敏結婚時，蔡志明豪擺180圍，昨晚就開80圍，蔡志明說：「加怡低調啲，但都請唔晒，惟有之後請番朋友食飯。」他透露送了一間大宅給女兒：「送咗間house，暫時婚後都住男家先，因為間屋起好咗好耐，要裝修。」過億？「都係啦，好貴。」
汪圓圓儼如新抱
弟弟蔡加讚送了一對腕錶給胞姊，加讚女友汪圓圓儼如半個新抱參加婚禮，加讚和圓圓又被催婚，加讚說：「（結婚）呢啲感覺要嚟就嚟，呢啲好serious，要時間準備。」
一對新人晚上在會展筵開80席，唐英年夫婦、范徐麗泰、謝賢、毛玉萍及兒子、大劉劉鑾雄及女友甘比、羅康瑞及朱玲玲夫婦等到賀。蔡志明嫁大女時豪派200萬給員工，今次就轉為派餅請食飯，現場派利是，又安排壽司、蛋糕、每支約2,000元的香檳王DomPerignon招待記者。
外父生意幫不上
蔡加怡早上穿OscardelaRenta婚紗行禮，晚宴換上VeraWang婚紗配父母送的百卡鑽飾出現，新郎肉緊拖實蔡加怡，更感動到眼紅紅，他說：「我會永遠咁錫佢，可以做到嘅都會做。」但外父生意就未必幫手，蔡加怡透露去歐洲蜜月：「係去年底求婚，我哋會二人世界一段時間先，再諗生，但唔會做全職太太。」
現年30歲的蔡加怡，畢業於美國波士頓大學會計系，後於香港理大取得企業融資碩士，25歲時成為當時全港最年輕的上市公司主席。
採訪：顏英儀
攝影：仇志德、陳慧安
小八卦：一飛聰天
「陳×聰」果然是一個豪門女婿的靚名組合！陳振聰搭上小甜甜龔如心，踏上富貴之路；賭王二房正印女婿陳子聰，三房未來女婿陳山聰，百億玩具大王蔡志明的新女婿陳漢聰，名字也是同一組合。