如果你問導演彭浩翔為電影犧牲了甚麼，他應該會答你，一個不拍鹹片的人，先後孭了三部三級片上身，三級等同鹹濕，成為維基網上一道不能磨滅的記載。今次被列三級是自招，好端端的電影，粗口開場講到散場，人、獸性器官亂飛，唔知以為自己入場看國家地理頻道。導演認為粗口從電影盤古初開都被河蟹，這趟為電影補白是其深層意義，同時彭浩翔話：「社會怨氣重，現實好多人想X，惟有入戲院亂噏廿四發洩。」既有歷史任務又可以出氣出火，電影功能多過一隻出奇蛋。 撰文：溫敏芝、張俊銘
上映日期：8月9日
導演彭浩翔跟杜汶澤早前接受訪問話電影開拍的前提並不出奇，只是基於幾個簡單原因，彭浩翔說：「最重要係我咁啱有時間，投資者唔介意冇大陸市場，而且劇本任我寫，有乜好玩得過咁樣拍戲。」所以找來老拍檔杜汶澤用飛紙仔形式邊拍邊寫劇本，完成這套近乎瘋狂，但又拍出電影人血淚史的低俗電影，一不做二不休，連戲名都不想，就叫《低俗喜劇》。內裏劇情全部集影圈真人真事而成，粗口不在講，既有人獸交，又踢爆女星上位秘技，三級自然走不了。導演表示一直覺得香港電影有一個地方很不合理，他說：「拍黑社會講數都冇人講粗口，有乜可能仲斯文過我。你試吓擺個錄音機喺街，唔使一陣已經錄晒粗口。」所以他決意為過往留白的港片補回一段失去的畫面–講粗口。
粗口文化字字有來歷
其實，還有一個深層原因，彭浩翔說：「近期社會怨氣好重，現實好多人想X，但X唔到，惟有入戲院亂噏廿四。」他表示，香港電影拍粗口戲想通過香港電檢的審批亦很無稽，他說：「好似張家輝喺《出埃及記》好嬲咁X你就得，如果開心咁X你就唔得，電檢處解釋話因為開心講X會教壞細路，其實呢個準則都唔合理。」反而今次電檢出奇地沒有刪剪任何一個鏡頭。
當中所有粗口字字都有出處，特別是鄭中基演的廣西黑社會，用的粗口詞彙一樣但用法不同，他說：「我哋香港人多數鍾意加男性性器官喺每一句度，佢哋相反鍾意用女性器官，即係『能』字變『西』字。」除此之外，彭浩翔發覺不用照顧內地市場可以令創作更具幽默感，加上近年香港受負面情緒困擾，令到開拍《低》片更具意義，特別是一段當事人杜汶澤的親身經歷更加引人入勝。
廣西豪門宴慘絕人寰
杜汶澤親身解畫：「未入行前我做收數嘅，有次收大數之後老細好開心，請我哋去食野味，成場戲都係我講畀導演聽，佢話會有適量改動，點知出嚟改動得2、3%，戲中97%都係我親身經歷。」
這場「廣西豪門宴」，講述飾演電影監製的杜汶澤遭「廣西黑幫大佬」鄭中基迫人獸交外，又迫他吃「龍虎鳳」（蛇貓雞）、牛歡喜（母牛的性器官）等野味，是電影高潮位之一，當中關鍵阿澤究竟有否與騾女親熱？在片末由聰明人去聯想，阿澤亦笑說：「現實我同部戲一樣斷咗片，之後嗰場搵返記憶嘅戲完全係導演創作。」彭浩翔笑言在電影圈打滾十多年，看過不少奇怪經歷，啟發他將這些題材混入戲中，好像開賭檔扮拍戲，也是真實事件，他說：「以前有人幫屋企人經營非法賭檔，佢扮導演拍戲以防差人嚟冚檔。」
杜汶澤炮轟反骨大導
港人港片一直是不少電影人那杯茶，《低》片是還原基本步回到最初，阿澤語帶欷歔說：「我成日都講呢樣嘢好慘，香港係我出世嘅地方，我喺呢度長大，我哋香港人唔係人？因為家有大陸市場就唔拍戲畀香港人睇啦，咁係乜嘢意思呢？我最記得有一次，我拍緊個大導演，佢有部戲上，人哋問佢『導演想香港票房點呀？』，佢話『香港票房關我X事，我只係睇大陸之嘛』，我喺後面揸住個飯盒差啲想喊，你條友仔都係香港觀眾養大㗎，乜意思呀，你家發咗達就淨係拍戲畀內地人睇喇，香港人就唔係人，咁樣好忘本，有時返去呃吓人仔，間中又返嚟香港拍吓戲都得啫。香港係一個漁港，一百年前到今日，有幾時靠過人，點解無端端呢十幾年，個腦成日諗住要靠人哋幫先有飯食呢？我哋一樣可以靠自己，有自己電影㗎，咁我哋可能係低俗啲，但係咁都係屬於自己吖。」
低處未算低
《低俗喜劇》擺明車馬以低俗笑料為港人消怨氣，到底有幾低俗？睇吓劇照都估到幾成。
