中國第一位女太空人劉洋就快與其他兩位太空人來港訪問，當然會有統戰成份，順便向學生灌輸吓國民教育吖嗎。以前楊利偉來港，便曾到大學與學生交流，好似好受歡迎，達到統戰目標。有人講美國都有愛國教育啦，香港提有乜稀奇？係嘅，冇話搞愛國教育唔啱，但係美國人講完愛國，跟住就可以破口大罵政府，美國第一位女太空人SallyRide亦非「國家培育」出來嘅，佢在私立大學史丹福讀物理與英文，碩士讀物理，博士學位專攻物理，一生不結婚，與女士同居二十七年，做自己鍾意之事。劉洋就係典型中國國家產品，畢業於空軍長春飛行學院，有中尉軍銜（2005年），兩位女太空人之出身背景，反映中美國情之不同，美國嘅國民教育與香港嘅中國式國民教育萬萬不可比較。
最近午飯後散步，行行吓行到「娛樂行」嘅HMV，買一啲電影DVD，見到有一隻「非常愛樂團」，不知是甚麼，但價錢十分便宜，於是順手買下，星期日下午在家播映，原來係法語片，好彩有中文字幕，套戲非常好睇喎，笑中有淚，既然有咁多家長聯署出街遊行反對國民教育，不如就買呢隻DVD，晚上與孩子一齊睇，講解吓，為兒女腦袋消毒。
「愛樂團」就係蘇聯時期之「莫斯科愛樂團」，80年代初受蘇聯共產黨整肅，全部指揮、樂手被解除職務，屬大師級嘅指揮家變成抹地板清潔工人。首席小提琴手與丈夫因是猶太人，被流放到西伯利亞，凍死於勞改營。大提琴手就變成一個救傷車司機。某日，指揮家在愛樂團辦公室抹地板之時，四顧無人，見到一份來自巴黎嘅傳真，邀請愛樂團到巴黎演奏，呢位指揮家心生一計，大膽收埋張傳真，去搵那一位當年整肅佢地嘅蘇共黨委（依家在俄羅斯已經冇得撈）與巴黎交涉，自己就與救傷車司機周圍去搵番啲愛樂團舊人，組成樂團去巴黎表演……故事簡單，情節有啲犯駁，故事係大團圓結局，有啲出人意表，但我地一路睇，一路笑之餘，諗起四十年前，中央樂團，小提琴高手馬思聰等等，咪又係遭遇同樣命運！當今80後、90後以至下一代應該唔識嗰啲事，家長不妨叫佢地睇呢套戲，配合中國國情，講解一番。