中國外運（598）股價倒水咁倒，一個字：「殘！」中外運最近半年，股價跌咗過四成，現價0.98元，已經挨近2008年金融海嘯價（0.65元）。而對上星期，集團日線圖9RSI得番6，連月線圖9RSI，亦都跌到落21超賣區，殘到爆，當博技術性反彈，已經有得諗。中外運股價咁殘，原因係市場驚環球經濟唔掂，集團業績唔多盞。但要咁睇，論實力及股東背景，中外運有贏面，經濟一TurnAround，集團跑出。BeforeThat，中外運手頭淨現金20億港銀，係超級現金牛，而呢個低殘價嘅NAV折讓，又上到57%，PB得番0.4倍，係近七、八年嚟，最吸引水平。博中外運彈番上5月橫行頂1.25元，潛在回報率26%，仲未有耐上到NAV2.3元。
漢傳媒可煲冷灶
漢傳媒（491）NAV0.23元，現價（0.055元）仲要低過2008海嘯價，NAV折讓高達76%，有相當唔錯嘅折讓墊底。再講，漢傳媒現金雖則唔多，但話晒都係淨現金6400多萬銀，財政冇問題，而呢個超殘價，總市值得番6000萬銀，平過殼股。呢期唔少仙士股郁郁吓，冷灶煲一煲，博漢傳媒升20%到0.066元，未有耐到NAV。
錢雋