兩位準龍媽羅敏莊同文頌嫻噚日腹大便便現身灣仔會展嬰兒展覽，羅敏莊11月預產期，噚日老公陳國邦不惜貼心照料，全程傍實左右，幸福滿瀉，而8月底臨盆的文頌嫻則明顯腫脹肥大，仲笑自己論盡，羅敏莊話：「以前大家做女時都好瘦，冇諗過會突然咁大個肚，之前Toby（梁靖琪）結婚我哋仲同枱坐。」接着文頌嫻竟講笑話：「我計過喺嗰日受精。」
陳倩揚追第二胎
兩位準媽媽同樣陀女，份外投緣，同樣決定會餵母乳，又公開研究餵人奶情況，話有朋友介紹搵人按通乳腺可以令人奶流得更暢順，文頌嫻仲驚爆：「聽過朋友講多到唧畀老公冲凉都得，因為多少唔關胸大細事，係乳腺問題。」羅敏莊即刻笑住話：「好AV喎，好啦，如果到時有咁多就畀老公冲凉啦。」
已為人母嘅陳倩揚就喺另一單位分享育兒心得，示範湊初生嬰兒畀現場準媽咪睇，陳倩揚都有意再追第二胎，但要搵多啲錢先，話家BB已經識叫媽媽，仲成日眨眼電佢。