最近dmc數碼廣播電台新聞多多，搞成點都好，數碼廣播始終係大趨勢。日系大廠JVC亦開始將DAB+數碼技術融入旗下音響產品內。最新又最過癮，係大大碌炮管外形嘅BoomBlaster，前後13吋超重低音喇叭，拎出街聽大班開咪又或轟吓LadyGaga，零舍火爆！
記者：許福合
攝影：譚盈傑
模特兒：Paris＠PureModels
前後重低音
別以為聽電台就好老土，你睇吓一堆最新支援DAB+嘅音響，外形幾前衞幾火爆！外形極具霸氣嘅「重炮手」BoomBlasterRV-NB90，就係近年少見嘅大型手提式HiFi。機身設全音域喇叭，高中音已經夠清脆細緻，加埋機身兩側分別裝有13吋超重低音喇叭，前後打孖上，低音自然特別澎湃！除內置CD、FM電台外，亦跟上潮流支援DAB+數碼電台廣播，能以接近CD音色收聽電台節目，30個頻道記憶，真正行到邊聽到邊。
機身還設隱藏底座，供接駁iPhone或iPod，仲可以幫手叉埋電㖭。罕見加入混音功能，可接上咪或結他，與歌曲混音，加上拍子機功能，用來唱K、Jam歌都得，可玩性相當高！
家用汽車都有得玩
家庭同汽車音響上，都有新產品加入支援DAB+，好似UX-LP66，傳統HiFi賣相，可設置30個DAB+頻道，機身亦有可揭式iPhone底座，喇叭總輸出達到60W，細細部慳位型一樣咁好轟。
汽車音響都無忽略，KW-DB70特大面板配合加強式DAB+天線，接收數碼電台更清晰。輸出功率有50W×4，加上內置24bitDAC，整體分析力水準不俗，而且讓用家在三萬種顏色按鈕燈光中自由轉換，放在車內絕對係有聲有色。
DAB+小檔
香港的數碼廣播會採用DAB+制式，特點是兼容性較高，DAB+器材同時可對應其他地區的DAB廣播。音色方面，能媲美CD音質，容許更多節目放送，現時香港覆蓋率約有70%。
查詢：JVC（27328220）