各位業主、投資者，我投降了，你哋慢慢加價、反價吧，我唔玩啦！
呢兩個月，不斷在柴灣區搵樓，目標係藍灣半島，貪佢近老婆外家，方便將來照顧BB。用藍灣上車係咪「大想頭」？係㗎，但請你睇吓其他單幢樓、甚至居屋開乜價，就發覺藍灣其實唔差得好多，但設施就好適合妻兒，貴少少都決定頂硬上。
但係，我不斷進出代理行、上網頁搜尋，經紀佬都話：「廣告上的樓盤，已經唔係呢個價。」仲話鐵價不二，完全無價講；加10萬已算好好人，有啲加完價，見你諗緊計緊，竟然索性封盤唔賣！
我老友仲誇張，九龍區四小龍（荔枝角某屋苑），銀行估500萬，業主開520萬，老友唔講價照畀，業主竟然勁反至580萬，願者上釣咁款。結果，又買唔成。
業主同買家非親非故，當然無理由益人，邊有得怪？但係點解社會咁畸型，有人買樓好似買棵菜，放埋一邊丟空都唔在乎，但我有迫切需要，儲儲埋埋，又被業主一口咬晒，佢反我廿萬，即係我要畀多六萬蚊首期（做七成按揭），試問六萬要儲幾耐？當我哋無用啦，我真係儲唔切、追唔到。
讀者 柴灣人
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。