思想影響行為，態度影響生活，閃婚後的梁詠琪（GiGi）變了。
GiGi最新國語碟《ButterflyKisses》封面相當隨意，薄施脂粉，一對招牌大眼袋，好明顯冇執相，披頭散髮，隨手舉起一部菲林相機，但是，以上的構圖都不重要，聚焦的地方應該是抿嘴帶甜的笑容，由心而發，清新自然，一個封面，一張CD，說明了蛻變的梁詠琪。
GiGi不再是灰姑娘，由嫌棄變成幸福小婦人，今日，她再憑歌寄意，將所有愛和幸福，融化在她的曲和詞之間，分派給所有人，包括舊愛鄭伊健，GiGi希望他都可以得到幸福。 撰文：楊潔雯
梁詠琪的新國語碟《ButterflyKisses》直譯是接吻的蝴蝶。在外國，這是一個傳情達意的小玩意，兩人面貼面用眼睫毛互相觸摸對方，畫面甜蜜溫馨，梁詠琪和老外老公Sergio將ButterflyKisses的意境，變成一首歌，一張國語大碟的名字，更藉此紀念他們相愛的開始。
翻譯歌詞冧老公
GiGi笑說：「呢個名係我同老公一齊改，我哋覺得可以係隻歌名，咁啱收到隻歌又好襯呢個名，我就叫林一峰幫我填，首歌好sweet，新碟有六首歌，都係講我呢個階段嘅心情同人生觀，其中有一首歌《我知道我不夠完美》係我填詞，係寫我對未來嘅睇法，世界係唔夠完美，不過我對你嘅愛係唔會變，成隻碟係以清新同舒服為主，好似我家咁，隨心。」
GiGi憑歌寄意，又借新碟向老公Sergio傳情，翻開GiGi的大碟，見到中文歌詞附有英文翻譯，大家心裏明白，卻又忍不住向GiGi求證，她甜絲絲地回答：「咁佢唔識中文，呢啲英文係畀佢睇，係我自己翻譯㗎！呢部份佢係唔知㗎！到時佢見到隻碟先會知道，我諗佢實開心到喊。」講到個喊字，GiGi偷偷地笑，然後詳談跟老公Sergio的新生活。
婚姻改變人生觀
新碟應該是GiGi新婚的禮物，概括了她婚後人生觀的變化，她說：「係，呢隻碟符合我家心態，家叫我唱番《嫌棄》、《灰姑娘》我都覺得有啲怪。家嘅我可以真情流露啲，而自己最想傳達嘅嘢，係畀人開心快樂，對我嚟講係一個positive嘅轉變。」
隨心出發，GiGi變得積極開朗，容量更大，閃婚未嘗不是一件好事，連GiGi都發覺，自己變了，她說：「不過我覺得係同結婚冇關，係我搵到一個打開個心嘅人有關，之前我係收收埋埋自己，冇信心，係欠缺咗啲乜嘢，變咗呢樣嘢影響埋我對愛情嘅睇法，家我就好似有人打通我五臟六腑經脈咁，通咗做乜嘢都舒暢咗，順咗好多。家我好似對全世界人都有信心，係因為搵到一個soulmate（心靈伴侶），好多嘢係唔需要講，好似呢個世界明白自己多咗，真係好奧妙呀！」對，愛的魔力就是如此強大，看，任性的灰姑娘如今已變成大愛的小婦人！
DIY國語碟大滿足
梁詠琪首張DIY個人國語大碟面世，作曲填詞不在話下，選曲、監製、企劃、宣傳全部一腳踢，為了新碟，GiGi無暇享受新婚生活，忙個不停，卻又樂在其中，她說：「今次自己監製做埋企劃拍埋MV，知多咗好多嘢，個人宏觀咗，以前就好似隔重紗咁，只係知道點運作，唔會深入了解，家自己一手一腳做，知道乜嘢最適合自己，過程中，我老公都有份參與意見，所以今次有好大滿足感。」
髮型：NickLamofOrient4.com
化妝：CircleCheungofND&Co.
服裝：MarcbyMarcJacobs、MarcJacobs