湖南少女趙常玲改投他國懷抱，以祖爾菲亞呢個名字，代表哈薩克喺星期日女子53公斤級舉重贏咗面金牌（圖），成為一時佳話。祖爾菲亞「一舉成名」之後，得到高度重視，更加獲國家總統接見，認真威水。唔單止有名，佢因為奧運奪冠仲豬籠入水，據報金牌獎金有成25萬美元（約195萬港元），比美國運動員多成10倍；不過祖爾菲亞就冇證實係咪真係有咁多錢，只係話擔心自己會俾人打劫喎。