夏日炎炎，梗係要出吓沙灘影吓靚相。今日就搵嚟兩位啱啱出咗寫真集嘅Jumbo同Vivian，醒吓大家擺Pose貼士，凸顯長處、遮掩短處，人人變索女。加埋幫Jumbo影寫真集嘅Lio教路攝影技巧，咁就可以女夠索、男夠Pro，齊齊影番輯索爆夏日照，為2012年盛夏留個美好回憶喇！
記者：韓繼聰
攝影：Lio、伍慶泉（部份相片）
模特兒：Jumbo、Vivian@MspyModel
髮型：BlackieIp@HairR
化妝：ChristineChan@Feelsocool
挨欄趷腳變靚啲
Jumbo同Vivian喺今年一眾模中都算標致，所以好多宅男Fans都爭住買佢哋本寫真集。問到兩位擺Pose多過坐巴士嘅靚女，到底點先叫靚嘅肢體語言？佢哋不約而同話：「其實都無乜秘訣，總之就係要靚嘅盡Show，醜嘅盡遮囉。」吓？具體啲得唔得？細細粒又帶點Cool嘅Vivian即時鬼馬搶答：「好似我呢啲身形比較嬌小嘅女仔，就盡量搵嘢挨，或者企喺比自己矮嘅物件如欄杆、長椅旁邊，加埋小小趷高同屈腳，望落即時高番晒！」陽光味較重嘅Jumbo接力：「係女仔都鍾意瘦㗎啦，影相時不妨多啲扭身，又或者將隻手擺喺盆骨上面，影出嚟自然瘦好多。」
另外亦要留意，手腳應多屈曲擺動，能有助豐富攝影構圖，增強身軀美感。問到兩位有乜最愛Pose，原來Jumbo就最鍾意玩回眸，Vivian則愛特寫大頭，竟然兩樣都唔係Fans們最恨睇嘅部份。「Sexy唔一定要Show胸、趷籮嘅，表情搭演技一樣可以流露性感。」係我多心，硬係覺得矛頭開始指向Phoebe。
5500k色溫有夏日溫暖感
靚女有靚Pose，影𠴱位當然都要有好嘅攝影技巧配合。啱啱幫Jumbo影完寫真集嘅攝影師Lio就親自教路：「其實影相嘅器材唔一定要好Pro好貴，閃光燈都未必要，但定焦鏡頭就唔少得。」據Lio講，定焦鏡影像質素一般較高，透視感突出，而且光圈較大，影人特別靚。
另外，Lio亦建議夏日攝影可多利用反光板：「夏天當然主打影自然環境，用閃光燈稍嫌感覺太『硬』，對初學者嚟講唔易控制，反而用反光板反射番少少自然光，感覺會更舒服啱Feel。」講到實戰，Lio就提醒用相機測光時要小心唔好用錯水面或砂面測光，因為會因反射陽光而令主體Under（曝光不足）。另外，Lio亦建議要用手動調校色溫，避免用Auto，一般以5500k最正路，顏色會略帶夏日溫暖感覺，當然都係要睇環境做人喇。
Lio推介 夏日三鏡
EF35mmf/1.4LUSM（$12,880）
鏡頭唔使太Wide，因太Wide易變形，一般影人35mm已經好夠。影到人之餘，亦可影埋四周夏日靚景。而由於鏡頭夠Wide，取景夠闊，方便後期裁相。
EF50mmf/1.4USM（$3,380）
一般攝影師所謂嘅標準鏡，與人眼視野相近，可拍出具現場感的照片。此焦距可謂「進可攻、退可守」，影半身更係Fit晒，透視感亦比較好，影人特別有修長美態。
EF85mmf/1.8USM（$3,580）
三個焦距中最長的85mm，除咗可以輕易拍攝特寫外，去沙灘少不免會落水，有支長鏡就可「隔岸觀火」，影到靚女又唔怕整濕部相機。
查詢：Canon（31912333）
模必備：眼藥水增電力
正如兩位靚女所講，除咗拋胸露肉，表情一樣可以引死人，而一幅靚樣又點少得一雙明眸？一支小小嘅眼藥水原來係佢哋嘅必備工具。滴一滴，眼睛即時精靈咗，更有水汪汪嘅感覺，相片零舍有Feel。
寫真集轉戰電子書
咪以為書展、漫畫節閉幕，模寫真集大戰就告一段落。最新戰場轉至網上電子書店，眾多模寫真將陸續上架，好似頗具規模嘅「MagV雲端書城」，就有今日主角之一嘅Jumbo寫真集登場。《MagV》App本身免費，揀啱書先畀錢，收費方式好在唔係逐本同你計，而係以年費計算，書店上雜誌同漫畫都有，鍾意八卦或刨書嘅肯定話抵睇。
