主張、鼓吹回購領匯人士嘅主要論點係政府回購之後，房委會管理商場可以降低租金：商戶得益，小商戶回巢，於是貨物零售價可以回落，令公屋（現在住戶）得益，亦因為小商戶回歸，趕走連鎖店，公屋居民可以重溫昔日與小商戶（講得最多嘅係文具店與街市攤販）買十蚊貨，閒談一兩小時嘅溫暖人情。
講到咁理想，純屬政客猜測，毫無理據與數據支持。公共政策若由情緒主控，不計工具理性，梁特首與班行政會議成員不如將外滙基金派清光好過，用近千億元回購領匯而立即減租嘅話，所有商場資產值會立即急跌，譬如返回未上市前嘅租金水平，市值就應該降到三百億元，加上房委會管理能力大有疑問，市值要打一個折扣，去到二百至二百五十億元左右，如此一來，我地納稅人立即蝕咗七百億元有多，梁振英可唔可以賠番俾我地納稅人？
如果話只買四分一股權，動用二百億元左右，買嚟做乜呀？收息呀？派個人入董事局要領匯減租？港鐵董事局有咁多政府代表喺度，港鐵有冇加票價呀？天真之事，無謂多講。
如果政府有意動用近一千億元幫助公屋戶，回購領匯只會幫既得利益者（即現有居民和靠公屋選票上位之議員），對全港並無好處，前運輸及房屋局長鄭汝樺估計過，起一個公屋單位需四十萬元，當現在有建材通脹、或建築工人短缺、工資上漲，每個單位需成本五十萬元，那麼一千億元可以興建二十萬個公屋單位，可以將公屋輪候時間大大縮短，惠及所有合資格入住公屋人士（現時共十九萬人輪候公屋，18-29歲青年人佔四分一），可以好快解決為人詬病之籠屋問題。呢個社會利益係非常實在的，遠勝於一味靠估之回購領匯所帶來之現有公屋居民的想像利益。任何政客鼓吹回購領匯，必須向輪候公屋市民解釋清楚：為甚麼不將回購款項用於加快增建公屋？領匯商場為現有公屋居民帶來的痛楚（假如是真的）是否真的大於籠屋居民和輪候公屋居民的苦楚（100%是真的）？政府運用公帑，須用之有道，須要計及社會成本效益及機會成本。管錢嘅曾俊華司長與陳家強局長對回購領匯之議，反應十分冷淡，梁特首唔會熱昏腦袋呀嗎？