大的水升格為金的水！應屆環法冠軍英國嘅韋堅斯，喺男子單車公路計時賽為東道主英國奪金，果然無負主場觀眾貼晒兩條金的水為佢打氣；佢喺賽後就重申，點都唔會剃呢兩條幸運大的水。
「金的水」沿途力撐
奪得環法之後，32歲嘅韋堅斯嗰兩條大的水，已成為標記。喺周三嘅男子單車公路計時賽前，有英國報紙就特登隨報附送兩條金色大的水（上圖），等觀眾可以貼喺面上打氣。結果，喺全場44公里嘅賽道旁邊，出現好多「金的水」粉絲，連韋堅斯睇到都笑到唔停口：「我沿途見到觀眾貼住大的水幫我打氣，實在太搞笑喇！我之前都唔知大的水係咁受歡迎㖭！」當被問到奧運後會點處理自己嘅大的水時，韋堅斯就話：「我梗係會留住啦！」
韋堅斯的確厲害，因為呢面係佢第4面奧運金牌，仲以7面奧運獎牌，壓過賽艇名宿列格夫，成為歷來最多奧運獎牌嘅英國運動員。
英軍爭金靠「熱褲」
倫奧單車公路賽完成，噚日展開咗場地賽，今日仲會決出男團追逐賽及女子凱林賽嘅金牌，兩個項目英國都係熱門！為咗萬無一失，英國有秘密武器，就係電池熱力褲！選手喺熱身後、出賽前，都會着呢條褲，以保持臀部同大腿溫度喺攝氏38度，作用如同F1使用嘅輪胎保暖裝置咁。女子凱林賽大熱嘅英國靚女彭度頓就話：「着上呢種褲之後，你真係會感覺到裏面嘅溫度，對運動員的確有幫助。」
