倫奧是今年一大盛事，不少歌手名人都會食住個勢，乘機抽水兼自我宣傳一番。其中著名英國樂隊Coldplay由於正舉行美國巡唱，未能在倫奧開幕及閉幕表演，但主音ChrisMartin在演唱會中不忘提及奧運會，竟扮忘記歌詞，搞笑賴掛住諗賽事而分心，又爆粗鬧倫奧，成功博見報。
掛住跳高
Coldplay周日於波士頓舉行巡唱，當Chris準備彈唱歌曲《WarningSign》時，突然亂彈及忘記歌詞，全場觀眾則立刻拍掌及歡呼，似乎預料Chris「玩嘢」。之後Chris摸頭扮無奈兼爆粗說：「噢X！我掛住諗奧運，搞到分咗心！我知我唔應該諗嗰場跳高賽事。」當大家以為他繼續彈唱時，Chris又說：「大佬，倫奧係好大件事㗎！我一生人只會經歷一次倫奧咋，所以你唔好怪我掛住諗。天啊！個XX奧運家喺倫敦搞緊啊！」
網友鬧爆
講完一大餐後，Chris就拋磚引玉，將話題轉回演唱會自誇一番：「但最重要嘅係，你哋家聽緊係全世界最正嘅演唱會，所以X倫奧！我哋今晚喺波士頓要盡X興！」其實Coldplay下月9日會為殘奧作閉幕表演，所以Chris即淆底補飛，笑言只是搞氣氛，叫大家別太認真。不過很多網友都不解Chris的英式幽默，以為他真的忘記歌詞而借奧運過橋，因此在網上狂轟Chris不專業。
事實上，不少英國著名樂隊都有份參與倫奧，如開幕有ArcticMonkeys，閉幕則是Blur，至於Muse的歌曲《Survival》更獲選為大會主題曲，早前Muse還有份傳送火炬，認真威水。