吳雨霏（Kary）最近同網球王子前男友洪立熙玩復合，月前仲被記者發現同洪立熙去布吉慶祝26歲生日，認真甜蜜。不過，唔知點解Kary有滋潤都依然爆晒瘡，前日下晝佢去中環太子大廈試衫嗰陣，就見佢額頭正中位置爆咗粒暗瘡。
前日下晝五點幾，Kary由助手等人陪同去太子大廈嘅Leonard試衫，全程戴住黑超嘅Kary冇化妝，個樣勁殘，但就有啲似黃柏高（Paco），見佢試咗件類似旗袍嘅銀色低胸晚裝，外披一件皮草，由於當時Kary心口未加胸墊，所以件衫顯得好鬆，身材完全冇睇頭。Kary邊試邊由助手用手機影低相，眾人前後逗留咗20分鐘就走人。臨上車嗰陣，Kary終於發現記者，跟住好風騷咁揮手拜拜。採訪、攝影：吳耀輝
