【全港獨家】恐怖經典《生化危機6》，剛喺美國E3曝過光，七月頭XBox亦開放試玩版下載，Leon、Chris、Jake三名大漢各有風味。全男班有啲Dry？今次專誠遠赴大阪CAPCOM開發部重地，獨家搶先試玩索女Ada，周旋喺喪屍之間，揸住弩大屍殺！
記者、攝影：韓繼聰
鳴謝：CAPCOMAsia
全球唯一一次試玩
今次《生化危機6》有新嘢試玩，除咗《蘋機會》為香港唯一傳媒受邀外，亦有幾位歐美記者參與，齊齊飛到大阪集合等打機。一行十幾人直踩CAPCOM總部，幾位製作人現身先講吓有咩新嘢玩。原來今次主要實試「Bio索女榜」第一位嘅Ada，製作人更話呢Part試玩唔會搞第二次，想玩就要等隻Game正式推出，可算彌足珍貴。
工作人員將一間會議室佈置成試Game房，我都無心機聽繙譯講乜，只係好心急想快啲玩Ada，一人一機一耳筒，二話不說極速開打。原來除咗獨自闖關，亦有同Leon相遇情節，最後聯同Ada合作KO喪屍Boss過關，不知不覺，由天光打到天黑，足足煲咗六粒鐘！
Ada單拖解謎兼射屍
一開波，見Ada企喺屋頂型爆飛落地動畫，之後便可自由走動。首先我四圍巡吓兼熟習一吓操作，發現香港機迷話試玩版鏡頭過敏嘅問題，已有大幅改善，畫面亦有所增強，廠方改善速度好快手。戰戰兢兢開始走入幽暗古屋，陰森壓迫感頗強，氣氛營造有番一、二集水準，喪屍造型亦頗特別，大多屬骷髏頭扮相，有幾分《盜墓迷城》感覺。Ada除咗要同喪屍火併外，更要解決多個謎題，例如死屍同開關掣有乜關係、又點樣利用喪屍打通電流開門等，需要花點心思去解謎，總算多一點舊《生化》感覺。戰鬥方面，Ada有一把弩跟身，但殺傷力不強，加上Reload需時，只適合遠攻，好彩另有長短槍跟身，不過子彈依舊要慳住用。
重遇Leon打Boss死N次
經過一輪解謎同廝殺，終於進入合作情節，Ada重遇Leon及某位角色，更一齊激戰變咗喪屍嘅某人。所謂合作，係Leon扶助你跳過遠處，又或協力攻擊。起初合作感唔算大，不過當遇到最後喪屍Boss就唔同，皮厚血多勁襟捱，攻擊又癲，在場記者全都GameOverN咁多次。打完一輪僥倖生存，以為搞掂收工，點知仲要繼續打！今次仲玩埋過山車，沿路不停踎低避開障外物，又要打爆擋住路軌嘅雜物，一Miss即時車毀人亡，邊避邊打Boss，勁刺激！
經過一番惡鬥，總算KO那該死的Boss，工作人員亦隨即停機，對遊戲其他部份相當保密。唔好以為咁就玩完，之後仲有我鍾意嘅扮喪屍殺人「AgentHunt模式」、製作人專訪，以及CAPCOM總壇內部首次曝光等，BioFans要留意下周《蘋機會》喇！
Ada屬熱門Cosplay
貴為一代女神角色，兼且服裝唔刁鑽，所以Ada不嬲多Cosplayer扮。不過講到Google搜尋榜至Hit嘅，就係呢位激似蔡少芬嘅靚女；四代高衩裙造型，大髀綁支槍，簡單一個扭腰Pose已殺死人無命賠！
